အိန်ပိရိစီစီမ် (Empiricism)

ပြီးခရေ အခေါက်က ဒေးဗိဟုန်း အကြောင်းကို ရီးစွာမှာ အိန်ပိရိစီစိမ် ဆိုရေ ၀ါဒ တစ်ခု ပါလာပါရေ။ ယင်းဝါဒ ကို စကေ အကျဉ်းချုံး လို့ တင်ပြလားပါဖို့ ။

အတွေ့ အကြုံက နီပြီးကေ အသိပညာ ကို လက်ခံရဟိရေ ဆိုရေ ၀ါဒ ကို အိန်ပိရိစီစိမ် လို့ ခေါ်ကတ်ပါရေ။ တစ်စုံတစ်ခု ကို ငါရို့ ဇာပိုင်သိနိုင်ကတ်ရလေ ဆိုရေ အတွေးမျိုးနန့် ပတ်သတ်လို့  မတူညီရေ အတွေးပေါင်း အများကြီး အနောက်တိုင်း အတွေးအခေါ် လောက မှာ ဟိမ့်ကတ်ပါရေ။ အိန်ပိရိစီစိမ် သည် ယင်းအတွေးအများကြီးထဲ က တစ်ခု ဖြစ်ပါရေ။

ဒေနေရာမှာ အတွေးအခေါ်လောက က အစိတ်အပိုင်း တစ်ချို့ ကို ဖော်ပြလားပါမေ။
အတွေးအခေါ်ပညာ ဖလောဆော်ဖီကို လေ့လာကေ
၁။ Metaphysics ရူပဗေဒ အလွန် ပညာ (ဥပမာ - စိတ် နန့် ပတ်သတ်လို့  စိုင်းစားရစွာမျိုး)
၂။ Epistemology အသိပညာ အပိုင်းပညာ ( ဥပမာ - ဇာဟင့်ကို အသိပညာလို့ ခေါ်ကတ်ဖို လဲ၊ ယင်း အသိပညာကို ဇာပိုင် ရနိုင်ကတ်ဖို့ လဲ၊ စသည်ဖြင့်)
၃။ Ethics ( ဇာအမှားလဲ၊ ဇာအမှန်လေ၊ လောက နိတိ လို့ ခေါ်ရဖို့ လားမသိ)
၎။ Logic (ယုတ္တိဗေဒ)

အစ ရှိသည် ဖြင့် အစိတ်အပိုင်းတိ ဟိမ့်ကတ်ပါရေ။ ယင်းထဲကမှာ အိန်ပိရိစီစိမ် ၀ါဒ သည် Epistemology အတ်ပိစတိမိုလိုဂျီ ထဲက ဖြစ်ပါရေ။

အိန်ပိရိစီစိမ် သည် အတွေ့ အကြုံ နန့် သက်သီပြချက် ကို အခြေခံ ထားရေ ၀ါဒ ဖြစ်ပါရေ။ အထူးသဖြင့် အာရုံခံ အင်္ဂါက သိရမြင်ရ စွာကို အခြေခံပါရေ။ လူမှာ မွီးရာပါ အတွေးအခေါ် ဆိုစွာမျိုးကို လက်မခံပဲနန့် အာရုံခံစားမှုဖြင့် သိလာရေ အတွေးအခေါ်မျိုးကို ရာ လက်ခံရေ ၀ါဒ က အိန်ပိရိစီစိမ် ဖြစ်ပါရေ။

သိပ္မံ အတွေးအခေါ်မှာ လက်တွိ လုပ်ကြည့်လို့ ရလာရေ သက်သီပြချက် ခိုင်မာမှုကို မှ သိပ္မံနည်းကျ အတွေးအခေါ်လို့ ခေါ်ရေ မဟုတ်ပါလာ။ ယင်းချင့်သည်ပင် အိန်ပိရိစီစိမ် ၀ါဒ ၏ အသက် ဖြစ်ပါရေ။ အမြင်တိ အတွေးတိ ကို လက်တွိကျ မကျ စမ်းသပ်ပြီးခါမှ လက်ခံရေ အမြင်မျိုးကို အိန်ပိရိစီစိမ် ၀ါဒ လို့ ခေါ်ပါရေ။ မြင်ရမှာ ယုံမယ် ဆိုရေ ၀ါဒမျိုးဖြစ်ပါရေ။